राज्यात निवडणुकीचा प्रचार जोरात सुरू असून नेत्यांचे दौरेही जोरात सुरू आहेत. या काळात प्रचारासाठी नेते हवाई मार्गाचा वापर करत आहेत, त्यामुळे हवाई उड्डाणांच्या सोयीचा लाभ घेतला जातोय. निवडणूक काळात पैशांचा अपहार होऊ नये, म्हणून विविध ठिकाणी कठोर तपासणी केली जात आहे. हॅलिपॅडवरून प्रवास करणाऱ्या नेत्यांच्या बॅगांचीही तपासणी होत आहे.
दोन दिवसांपूर्वी माजी मुख्यमंत्री उद्धव ठाकरे यांच्या बॅगांची तपासणी करण्यात आली होती, त्यावरून त्यांनी नाराजी व्यक्त केली होती. परंतु आता देवेंद्र फडणवीस, अजित पवार आणि मुख्यमंत्री एकनाथ शिंदे यांच्या बॅगांचीही तपासणी करण्यात आली आहे. मुख्यमंत्री शिंदे पालघर दौऱ्यावर असताना त्यांची बॅग तपासण्यात आली. यावेळी शिंदे यांनी उद्धव ठाकरे यांना टोला हाणत म्हटले, “माझ्या बॅगेत फक्त कपडे आहेत, युरिन पॉट नाही.” उद्धव ठाकरे यांच्या बॅग तपासणीवरून शरद पवारांनी देखील टीका केली होती.
#WATCH | Maharashtra: CM Eknath Shinde’s bags were checked at Palghar Police ground helipad where he reached for the election campaign.
(Source: Shiv Sena) pic.twitter.com/44CnWiTYzG
— ANI (@ANI) November 13, 2024
अजित पवार यांनी देखील आपल्या तपासणीबद्दल प्रतिक्रिया देत एक्स (मायक्रोब्लॉगिंग प्लॅटफॉर्म) वर व्हिडिओ शेअर केला. ते म्हणाले, “आज माझ्या बॅग व हेलिकॉप्टरची निवडणूक अधिकाऱ्यांनी तपासणी केली. मी त्यांना पूर्ण सहकार्य केलं. स्वतंत्र व निष्पक्ष निवडणुका घेण्यासाठी अशा उपाययोजना आवश्यक आहेत, आणि कायद्याचा आदर करून निवडणूक आयोगाच्या प्रयत्नांना सहकार्य करायला हवं.”
विरोधकांनी या तपासणीवरून सत्ताधाऱ्यांवर जोरदार टीका केली असून, निवडणुकीच्या पार्श्वभूमीवर हा मुद्दा उफाळण्याची शक्यता आहे.
